أنا لـيبيـا

شعر محكي . عفاف عبدالمحسن 2014

تاريخ متزاحم .. حضارات .. وكروب ..

ووقت الشدايد همه

أنا ليبيا .. أنا الأم والأمة….

أنا الفرح وقت الغمة…..

وانا الزاد وقت الجوع

وقت العطش الميه …

أنا ليبيا ..

ما أطيح منى في الوطا…..

راني فراشك والغطا…..

ياجنين ترابي … راني ملاذك والدفا

أول خطاوى رحلتك …

نا بسمتك …..نا فرحتك وآمانك…..

ظلك في قيظ الصحراء…..

شمسك وكانون الشتا …..

يا ضنوتى … يا سامع نداي….

يلي حسبتك عزوتي….

والنظر وعيوني….

يلي عطيتك لوني ….

يا جاحد عطاي …يا وليدي العاق….

ياغافل علي .. يامواطي النظر

ولاحشم لاجعره .. مديت يدك للكفر

كشفت بي .. قطعت ثوبي الي سترتك بيه

وعريتنـــــــــــي ..

فوق روسهم عليت شانك

هنتني وذليتنـــــــي

أنا ليبيا .. عرق المحنه وافر

ندعي علي وليدي الجحود وليه

والعين تبكي عليــــه ..

ونغتاظ ملي يقولي آميـــــن

صيوره تردك نخوتك .. بيتيتك

عزوم الرجال حاشيتك

عالفرسنة ياجنين الروح والصدق ربيتك

قانع بحالك صابر

ناليبيا .. بقلبي الكبير الغافر

وانت وليد ترابي .. بيك الظفر ياظافر

انت حبيبي ياوليدي الليبي

عروقك الواثقة متلاحمة بعروقي

ومتشعبه في روحي

وشامخ وصامد كي روس النخل

عونك أنا ياعــــوني

نا ليبيا .. نا معاك فوق كل المحن

موحال نركن للوهن

يا سامع نداي  

صوتي تحشرج من الزعل

وليدي مخالف شيرتي

زايد شقاي وحيرتي 

وحالفه نرده لطوعي .. بحضن المحبة والمحنة والصبر والعقل

أنا ليبيا مرت علي ترابي كروب

حكوني اسطورة وصورها ع الحيوط دروب

فرسان هدوا وردوا سالمين من هول الحروب

أنا ليبيا تاريخ عامر بالوجع  بالشبع والجوع

لا طحت لا ذليت لاهنت ناسي

ولا عويلتي خانوا وباعوا

والي تعوج ردلي مردوع

 نادم وليدي .. قالي

علي جبينك .. وافرحي .. يا أمنا رانا عليك ارجوع