شعر -محمد التميمي
اليوم المساء
ف لحظة صفا..وحب ووفاء
قررت العطاء
لبلاد منحتني الهناء
وحب وغلاء
من غير ماتراجي وفاء
مني انا
!!!!!!!
لاتنشدوني من اتكون
اللي ساكنه ف رمش العيون
اللي صدرها دافي وحنون
واحضانها بلسم شفاء
ليا انا ،،وكل من مشى
اخطيوة ،،على أرض النماء
ومنها نشق ،،انسيمة هواء
وهام وعشق ،،اهل الوفاء
اهل الكرم والجود ،،بنغازي
!!!!!
كل من نشدتي ليش
في القلب ساكن حبها
واللي سألني بيش
اتقابل غلاها وودها
انا في جوابي أحترت
لأني انا ..مهما مدحت
واشعار فيها قلت
صاعب انوفّي حقها
اللي صيتها فوق في السماء
وتاريخها ،،فخر وزها.
ليا أنا
وكل من عشق ،،أرض النماء
والا نشق ،،نسمة هواء
من الغالية رمز الصفاء
والجود العطاء
اللي اسمها فيه الدواء
آرض الكرم بنغازي
———-
بلاد الكرم ..بنغازي
حتى بعيدة..اقريّبة
بلاد الكرم .. بنغازي
حتى عنيدة .. احبيّبة
انا ف ذكرها .. ابلغ كلام سمعت
وعلى ثغرها..احلى إبتسامة شفت
ومن بحرها..الصافي الجميل
بأطيب نسيم عليل
حسيت بيه شعرت
وكل ماحكيته.. وليكم رؤيته
هوْ .. من قواعد ساسها
واللي عرفته..واللي وصفته
هوْ،،كرم هلها وناسها
اهل المحبة والصفاء
اللي بينهم إلقيت الدفاء
ليّا أنا،،وكل من مشى
اخطيوة على وطن النماء
ومنها نشق ..نسمة هواء
وهام وعشق.. اهل الوفاء
اهل الكرم والجود بنغازي
!!!!
بنغازي .. إن عاشرت هلها وناسها
ايحطّوك جوّه اعيونهم
وعذب الشراب من كاسها
يرووك قبل واشونهم
ومايلحقك بيناتهم
يوم العطش ضماء
هكي أنا .. نعرف اخلاقهم
اهل الوفاء .. ف بنغازي
في الصابري والليبي
والكيش والسلماني
وفي السوق والبلدية
والفويهات والمحيشى
والبركة مع جليانة
وكل منطقة وشعبية
هذوم ناسها بنغازي
اصحاب الافضال عليّا
في الجامعة..قرّوني
بكل الوفاء ،،غمروني
بالحب والغلاء ،،ودّوني
ويوم الوداع وصّوني
قالولي بصوت حزين
والدمع مالي العين
انت اوخّينا وأوليدنا
وحبيبنا وصديقنا
ومن واشّونّا وضنانا
وياريت ماتنسانا
وكان الوداع ابْكاء
اليوم المساء..
بعد الزمان مضى
ف لحظة صفاء
اتذكرتها .. ونويت الوفاء
لأحباب ..منحوني غلاء
وحب وعطاء
من غير مايراجوا وفاء
مني أنا .. اللي انقول : ونا كلي رجاء
وحق الله ،،من علّى السماء
بلا عمدان،،في وسط الوطاء
بلاد العز ،، بنغازي الوفاء
تبقى دوم ،،عنوان الغلاء
(الحبيّبة ماتهون .. لحبيّبة ماتهون ..)
(.. اللي حبّها لقليبي دواء ..)
(..من قصائدي في ديوان بعيد السو 2006)