شعر – علي النكاع
شُمُّ الأنوف سيوف
فـ اقسى الظروف انخوفوا في الخوف
وما نقلقوا
شُمُّ الانوف جبال
انحايوا (الهُدى) وانقتلوا (الضلال)
ما نغدروا حتى بعدو مُــحال
انجوا روس صف الحق فَـ اي ظروف
اسياد في الكلام اسياد في الافعال
بدينا اوقوف وننتهوا بوقــــــوف
اعلينا علي علو الامجاد ابطال
بِرِفعة منازلنا و رِفعةْ شــوف
واللي اَوهم نفسه علينا طال
انجزُّووووه من جذره مثيل الصوف
وفينا التواضع نتبعوا ما قال
الله، نزرعوا في الخير والمعروف
عطانا جلال الله ذو الجلال
طغي حضورنا والباقيين خسوف
(اخفاف) للفزع لكن اجبال (اثقال)
أََقدامنا برز إقدامهن معروووووف
بلا احدود ديمة جودنا شلاّل
احني الجود عالساكن وعل لضيوف
كل حال خوه اكفاه فـ ايِّن حال
للحاب والكاره اتجوووود اكفوف
ما ايقلنا طبع الدهر ميَّـــال
علي عزنا كل الامجاد اتطوف
هالوقت طوّل في عصا دلاّل
لسان افتراضي، فـ واقعه مخطوف
والكذب ما يَطْول قصير احبال
ويطغى الحق ومنهجه مألوف
