عبدالباسط الفالح
جو ناقلين اجراح حاحينالهم
علينا رمو شايلين دم وهول
فزعنا بضمايدنا ودواينالهم
اجروحهم ابدوانا جيد المفعول
فكينا ضمايدهم تريح بالهم
طابن اجروحم اثر دوانا طول
راح سوهم احذانا وما عاد طالهم
السيا امعانا ريشا مبلول
وفرحوبنا وين ما اسقم حالهم
وفرحنا بهم ولقيو ذرا وقبول
وكان طيبنا جارف الروح هدالهم
وخذو قدر كامل بالوفاء مغزول
وخذو ودنا بالزود زاد دلالهم
وتحت الجناح اقعدو ما من حول
سبحانه بعد كم عام بان أهبالهم
واخياهم ودارو شي مو مقبول
عالغدر كانو ناسفين اجلالهم
وداسين الخيانة ناقصين اعقول
ماشي منا طالهم لانالهم
امفيت طيب أصل ابودنا منتول
كنالهم ربيع وبيه غندقنالهم
امفلت نواويرة ملا السهول
وما من خطا دارو ومشينا لهم
واجد احملنا وكثرو لحمول
وياما توددنا وتعذرنا لهم
بلا خطا سير زافين اطبول
خايفين فقدهم يمكن توطينا لهم
تعلوا علينا استصعبو النزول
ونحنا قيسنا انسينا وما قلنا لهم
علي اخطوط فيهن نقطعوا فالقول
بقشور يابسات اليوم بدلنا لهم
كيف بدلونا هكذي بالفول
موش طبعنا لكن بجر أفعالهم
ردت فعلنا كي قفلن لقفول
برا اقلوبنا كل شي طوحنا لهم
وهذا أقل ما يديرو ضنا الأصول
