جلال عثمان
لما كنت زمان صغيّر
كنت انشوف ف بويا عالم
ما في حاجة ما يعرفها
بعد كبرت
بدي رأيي شوية يتغير
بالك في حاجات كثيرة في
هالعالم ما يفهمها
وزدت كبرت
قعد تحليلي
أن بويا ..
مش عارف
حاجة عن جيله
لا عن جيلي
بعد ما الدهر إل كنت زمان نصارع فيه
بدا غالبني
قلت الباين بويا كاين ..
فيه شوي حاجات عرفها
لكن طبعي ديمة معاند
ما كنتش نبي نسمعها
ولما بدي الشيب يصاحبني
عرفت إنك يا بوي الغالي
ما في حاجة ما تعرفها
وندمت على أين كلمة .. ليا قلت وما نسمعها
طلعت أنت يا بوي العالم
طلعت أنت اللي تعرف عني
أكثر مني
يا ريتك مازلت معانا
نسمع منك وتعلمني
كيف قدرت بيد نظيفة ..
ترعى تسعة معاهم أمي !!
