سالم العالم
علي خد المسا بكيت مساءاتي
وتأوه في خيالي صوت ضحكاتي
وذوبني حنين الوجد
لصحابي وشقاواتي
وسهرني أنين الليل في راسي
وين شاف الصبح آتي
وتنهدت !!
وطافت في دهاليز الخيال
ذكرى بعيدة قريبة
وشميت ريحة طيبة
خطرت علي اميمتي
وهي داعية في الفجر
لبويا الله لا تغيبه
وتنهدت .. إيه يايام
وين الملاعب لولي
وين الرفاقة جولوا
وجيرانا لقدم وايش اخبارهم
هالوقت وين ديارهم ؟
زعم ساكنين في دارهم
ولا بعدنا حولوا ؟
وتذكريش زمان
وين مايحدث مناب لحد من جيرانا
انوضوا جميع انعولوا ؟
وتذكريش زمان واحنا صغار
ان درنا الخطا
وينت فينا شيخ من جيرانا
نواطوا العيون ونخجلوا ؟
وتنهدت !!!
وتذكريش فرحتنا صغار
بلبس الجديد في العيد والتبويزة
وكيف نتربوا ع العصر من صغرنا
وكيف النفوس عزيزة
وخدود البنت كيف تنحمر
وين ينحكى ع الجيزة
وكيف كان ديما ضحكنا من قلبنا
أولاد وبنات صغار طاهر لعبنا
وين نلعبوا الوابيس والنقيزة
ووقت العصر وشيابنا متكيين
ويلعبوا في السيزة
وفي برد الشتا .. كيف العوية يلمهم
شاهي مع لويزات وتهدريزة
وتنهدت !!!
ترى خبريني يام
شن صار في هالناس
وكنهم تغير حالهم
واحوالهم تمت عجب
ووين الحشم
ووين ترباية الأم
وسطوة وهيبة لب
ووين النخل لول
ترميه بحجارة
ينزل علي كترك رطب
وتنهدت
آخر كلامي يام
أكيد الزمان تغير
وماهوش كيف زمان
والمادة في عقولنا
طغيت علي الانسان
لكن أنا في خاطري
مازال عندي أمل
في ناسنا .. في اولادنا
مازال فيهم خير
وفيهم صفا وايمان
مادام ذكر الله في بلادنا
يعلى مع لذان
ومادام في قعداتنا
نذكروا ماكان
ومادام جوا عيونا
فيه للحبيب مكان
ومادام عزك ليبيا
في قلوبنا ماهان
