أحمد العبيدي
خايف اللي نحلم به يكون بعيد
ونعيشو علي قولت اساع ايجى
ياحلم تقعد وهم موش اكيد
والعمر يسرقنى اشوي اشوي .
خايف خدى يتكى عل ليد
ونقعد نرجا في بصيص الضي
بالك اساع يصدف نهار سعيد
يروق الحال والدم يجري في
قول خاطري حتى لاحلام تريد
تبي اللي مازال قلبه حى
الحلم تما ثقل عندى كيد
عقاب النهار الكيد جاي علي
مازلت نحلم يكون بكرة عيد
وباب الامل مفتوح ديمة لي
عارف اللي نبيه حلم وحيد
نشوف وطنا بين الوطان هنى
الاصحاب
ما تعبا عليها تقول عندى اصحاب ..
راك اتحزم بيهم كان صارت شده ..
عرب واجدة طاحت نهار لعطاب ..
مامللي نفض حتى ايديه وعدا ..
مامللي رخوه فوقت مايحساب ،.
دار حسبته يلقا تريس اتعده …
دير حسبتك ديمة قلم وكتاب ..
الوقت تما فيه امواير عدة
كان طحت ماتلقا مفيت سراب ..
تشوفهم كل حد ماسك يده ..
لاتقول كويس فلان لاشرهاب ..
ولاتقولي طالع لبوه وجده …
هضاك وقت لاتجيبه ولاينجاب …
ايام الرفق كل حد عارف حده ..
الا وقتنا مليان غير اخياب ….
حتى السلام مايطلق عليك يرده
فيك مصلحة تلقاه فم الباب ..
ايجيك ايتودد نين تلمس وده .
هضاا زمان مليان فيه اذياب
مايغربك كان شفت فيه موده ..
عين وجاته
من عين حاسد كارهة ضحكاته
غزالى امريض
غير عين وجاته
……
غزالي تاعب ….
ياما عانت مالحياة مصاعب
عشان كبدها حملت مغير متاعب
وحملت مواجع وقت و مهاياته…
……
غزالي كنه …
امريض برد واللا سوايا جنه
التمن عليه اوجاع غصبن عنا
صابر وكامى مايريد شماته..
……
غزالي كنه …
امريض برد واللا سوايا جنه
التمن عليه اوجاع غصبن عنا
صابر وكامى مايريد شماته…
……
غزالي يحس
من صوته داهش غالبه النفس
نحلف عليها عين جاته بس
توالي الحاسد طيحته واهاته
بنغازي
ماملي طايح علاته….
دارت منا شان كبير ….
ماملي راقد وإعاته…
شاف العز وشاف الخير …
بنغازي الاعمار بداته …
تشوف انجازات وتطوير …
ماملي جاها عجباته ….
شاف مدينة بثوب حرير …
تعرف ايش اللي دارته …
مسجل فالتاريخ شهير ….
ناضت نوضتها بثباته…
ناضت نوضت شيخ كبير …
قلبت الإرهاب ومسحاته…
انتصرت مارضيت تدمير …
اليوم نشوف عمار بذاته…
حق كلامى مش تزوير….
اللي جاها بالخير عطاته …
غنى والله شحات فقير …
اللي جاها امريض داوته …
بري جرحه من غير سطير.
تجني فيه اللى زرعاته…
ماهى محتاجة تفسير …
هي ام الوطن وباته….
هي الفعل وهى الضمير